好得 Volkswagen Touran 280 TSI Life

November 18, 2016
19,225 Views

無錯,MPV目的係載住一家大細出去遊山玩水的,要玩操控,可以買部高性能房車,不過第二代Touran唔是咁諗喎!

vw_touran_280life_02

結了婚,生埋仔,好自然,要舒適,載多啲,就要犧牲一下,換部7座MPV;最慘係,以前跟你出生入死上天下海的媾女戰車,要賤價求售,灰爆!雖然見到愛人同囝囝個開心樣,乜都值番晒,但每當夜闌人靜,午夜夢迴,全車人好夢正酣,就會想起那輛有你有我有情有天有海有地的EX。

vw_touran_280life_04

最易達成的欲望
假如男人命中注定要同時擁有3部車才能滿足欲望,出去威,我一定揀GT4,手波自然吸氣加中置後驅的黃金組合,無得輸。出席宴會,大方得體剛柔並濟的CLS,無論着Semi-Formal又或者Smart Causal都一樣襯到絕。假期用的,就要慳油、好力、舒適、實用之餘,最好當然可以劈得下。今次長測的Touran 280 TSI Life,全中。

vw_touran_280life_06

vw_touran_280life_07

同一底盤不同性格
有條件可以同時有齊3部車當然好,但如果只能擁有一輛MPV,有啲嘢,就一定預咗要犧牲。
第7代Golf,就算未親身試過,都應該聽過佢有幾得;而同一副MQB橫置引擎底盤所衍生出來的型號,除了今次長測的Touran,還有Sportvan及Sharan。Sportvan是3架之中最靈活敏捷,但只得5座位,載運量最低。Sharan就最大載得最多,但就不及Sportvan靈活。至於Touran則無論靈敏度或載運量都在兩者之間,整體表現較為中庸。

vw_touran_280life_05

vw_touran_280life_09

低容積低油耗
耗油量,對我來講都幾重要,有時兩公婆出去羅蔓蒂克,睇完午夜場食個宵夜行下沙灘數下星星,揸住部7人車留空5個位,已經有種莫名內疚感,如果加埋一副大容積高耗油引擎, 簡直覺得係一種罪孽。這輛280 TSI Life,引擎只有1.4公升,斯斯文慢慢揸,錄得每百公里平均耗油只需6.7L;揸快啲,進取啲,講緊都只係8.1L/100km,7人車來講,堅係慳油到不得了。

vw_touran_280life_08

加硬車架結構
唔好睇少這副引擎只得1.4公升,因為有渦輪增壓的關係,所以輸出可以去到150hp,而且踩上1,600rpm已經嚟料,配合7速雙離合波箱,輸出力度有驚喜,再加埋本身深藏的底盤功力,劈起上嚟,一般4門房車都未必有佢咁定咁好彎。此外,車體有17%的關鍵結構由1,000MPa超級鋼板製成,想佢變形,要20,000Nm,扭力相當於12部輸出1,500hp的Bugatti Chiron;要咁硬嚟做乜?好多這類高身的MPV,如果車架唔夠硬淨,揸得兩三年,就很容易開始出現金屬或膠件磨擦的雜聲;操控感方面,堅固的車架亦有助提高行車表現,唔信,揾部體形差唔多的日系MPV跑山比較一下,你一定揸得出有乜嘢分別。

vw_touran_280life_10

勁多儲物格
揸揸下車,想聽下香港白宮發言人有乜驚世偉論,長官先生夫人今日有冇用行動去體現超然地位,諗住用手指公扭大少少收音機,唔得喎,因為入門版280 TSI Life不設多功能軚盤,配備亦比較簡單,不過儲物格就多到數唔晒,睇返車廠資料,原來多達47個!其實車有時真係唔需要太花巧,能夠有不同的位置擺放紙巾飲品零食碎銀卡片黑超等雜物,對追求低耗油及操控性能的務實型用家來講,這輛Touran 280 TSI Life絕對值得一試。

vw_touran_280life_03

2016 Volkswagen Touran 280 TSI Life規格表
引擎:L4 DOHC 16V Turbo
容積:1,395c.c.
馬力:150hp@5,000-6,000rpm
扭力:250Nm@1,500-3,500rpm
傳動:前置引擎‧前輪驅動
波箱:7前速雙離合自動
0-100km/h:8.9秒
極速:209km/h
懸掛:(前)麥花臣/ (後)四連桿
制動:(前)通風碟/ (後)實心碟
輪圈:16吋合金
輪胎:205/60 R16
長x闊x高:4,527 x 1,829 x 1,659mm
軸距:2,791mm
車重:1,478kg
油耗:5.6-5.4L/ 100km (Combined)
廢排:128g/km
售價:$262,980

Tags

Leave A Comment

error: Content is protected !!