慳家豪艦 Mercedes-Benz S 500 e Plug-in Hybrid

December 19, 2016
Comments off
8,466 Views

有人話,有錢買貴車的,就唔會計較架車大食,呢種講法,其實唔啱得晒。

Meecedes-Benz S500 hybrid

堅有錢的人,尤其是搞實業白手興家的,最怕畀人當水魚,文雅啲講就是知慳識儉錙銖必較,粗俗啲講就是孤寒。最闊佬的,其實係唔使點做的二世祖,亦即係我夢寐以求的終極志願,又或者三更貧五更富、從事炒賣活動、舢板充炮艇呢幾種;這類人,座駕通常都比較浮誇。嗱!我講係「通常」咋。

愛上了後座
打開尾門,開啟角度好闊,門檻及C柱的高度與角度拾到好處,上車好方便;座椅勁軟勁綿,坐上去,成個人馬上被包住了,用門板上的按鈕稍為調校一下椅背斜度,順便用記憶功能,幫我記住一個咁正的坐姿。安全帶好軟,收緊力度啱啱好,有安全感之餘又唔會有種被箍住的感覺;閂門時細力咗,唔使開門再閂一次,系統會自動加壓把門關好。太陽伯伯好刺眼,門板有排掣,可以控制晒車尾所有車窗車簾開關,坐在平治S系咁舒適的後座,真係唔多想落車。

首輛混能車
車主可以分為用家及玩家兩種,大部分的用家,都會比玩家在乎汽車的耗油量,所以揸貴車的,都唔一定代表唔介意部車大咬,很多時還會比一般人更講求「用得有其所」,亦因為咁,平治早於第6代S-Class便開始增設Hybrid版,不過當年只有左軚,香港無份。去到第7代,終於有部右軚版油電混合的S 400 Hybrid,標準價$165萬,同級對手唔多。

追加外插式充電裝置
咁大架車,油耗平均每百公里6.3L,算慳油,但如果夾硬要同電動車比較,當然會輸。純電車,最大好處是補充能源幾乎零成本,不過缺點是動力會隨住電儲量減少而變弱,叉電亦要一段時間。至於汽油引擎,雖然用到最後一滴油都唔會影響輸出表現,亦沒有充電的煩惱,但油價高,對稠密地區亦造成一定程度的空氣污染。如果把兩者優點結合,有電行電,無電行油,行油時充電,入停車場又可以插掣充電,對於環境配套仍未成熟的香港,使用上比沒有插電裝置的Hybrid更加彈性。

低油耗高效率
今次測試的S 500 e,除了摩打及電池比S 400 Hybrid更加強勁之外,最大分別就是配備可作獨立充電的plug-in hybrid系統,餵飽電之後選用純電模式E mode,可連續行駛33km,最高時速更可達140km。在油電混合動能情況下,平均耗油僅2.8L/ 100km,廢氣排放亦只有65g/km,相對於S 400 Hybrid,油耗足足降低逾一倍有多!而0-100km/h加速亦只需5.2秒,表現同樣比S 400 Hybrid的6.8秒優勝。

同時提高油電輸出
既然大家都在油電混合模式下行駛,點解S 500 e可以比S 400 Hybrid更慳油及擁有更強的性能表現?首先睇下兩部車採用的引擎,S 400 Hybrid是3.5公升V6,輸出306hp及370Nm;而S 500 e雖然降低了容積至3.0公升,但V6偈加了雙渦輪增壓,輸出即時大增至333hp及480Nm。不過單靠提升不足30hp的引擎輸出,當然無可能把時間縮短了1.6秒。S 500 e的終極武器,其實是輸出115hp及340Nm的電動摩打,比S 400 Hybrid只有20hp及250Nm明顯強幾倍,再配合被提升了的引擎輸出,咁強的組合邊有可能唔快唔更加慳油!

幫你慳到盡
能夠撐得起強勁的摩打輸出,配合引擎把耗油量降低至媲美電單車級數,幕功臣還有電容量高達8,700Wh的鋰電池。此外,Intelligent Operating Strategy能源管理系統會自行搜集導航路線的路面狀況、駕駛模式及車速等,分析嚟緊8公里路程如何把引擎及摩打設定到最佳的動力分配比率及回收動能的時機。新增的E plus駕駛模式,當系統偵測到適合的路面狀況時,Haptic Accelerator Pedal會以震動方式提示駕駛人鬆開油門,這時引擎會進入靜止狀態,並以滑行方式繼續前進;遇到落斜或需要制動時,動力回收裝置便會加強內阻以達到更佳的減速效果及回充電壓,為降低油耗,可以去到咁盡。

適合長時間駕駛
踩油開車,為了消除突兀感,油門初段的敏感度較低。踩深少少,輸出力度足夠有餘,但講到操控感,就真係唔好抱住任何期望,因為無論軚盤還是懸掛的路訊回饋,都被先進的電子機關過濾得七七八八,如果是應付一整天急趕的駕駛路程,係會比較舒服輕鬆的,講到尾,佢唔是一輛driver’s car。想要番少少屬於駕駛人的操控空間,可以選用sport駕駛模式,但都唔好期望過高,而且相對之下,後座的感覺會比前座來的強烈,講到尾,S-Class都是一輛「老闆車」。

Mercedes-Benz S 500 e Plug-in Hybrid規格表
引擎:V6 DOHC 24V bi-Turbo
容積:2,996c.c.
馬力:333hp@5,250-6,000rpm
扭力:480Nm@1,600-4,000rpm
傳動:前置引擎‧後輪驅動
摩打:永磁同步電動
電池:8.7kWh鋰離子電池
馬力:115hp
扭力:340Nm
波箱:7G-Tronic Plus 配軚盤+/-轉檔
0-100km/h:5.2秒
極速:250km/h
懸掛:(前/後)多連桿
制動:(前/後)通風碟
輪圈:19吋合金
輪胎:(前)245/45 R19 102Y/ (後)275/40 R19 101Y Bridgestone S001
長x闊x高:5,246 x 1,899 x 1,469mm
軸距:3,165mm
車重:2,215kg
油耗:2.8L/ 100km (Combined)
廢排:65g/km
售價:$1,799,000

Comments are closed.

error: Content is protected !!