唔到你唔變Porsche 718 Boxster S

December 23, 2016
37,485 Views

可能你會覺得,用渦輪增壓4汽缸取代自然吸氣6汽缸是一個勁難受的消息,不過咁,有啲嘢,差唔多時候就係要轉一轉。

水平對向4汽缸,曾經是356、550、718、912這類咁有代表性車系的動力心臟,可以話,是保時捷元祖級的機器;不過,受科技與發展潛力的侷限,自第一代911裝上水平對向6汽缸引擎之後,舊有的4汽缸便開始被消失。為了進一步提高性能,編號930的第二代911更開始加入渦輪增壓器,並開創911 Turbo系列。

堅持水平對向
採用水平機器的車廠唔多,以前除咗VW,還有Alfa Romeo;仍有這份堅持的,現存只得Porsche及Subaru。
點解咁少車廠用?因為水平對向需要把汽缸分成左右兩邊作為平衡,導致汽缸本體、凸輪軸及氣門外蓋等零件需要使用兩種不同而又對稱的鑄造方式;另一方面,橫置汽缸散熱不均及地心引力偏向問題,亦間接令氣門出現積碳情況而影響壓縮效果,大大增加製作及設計難度,成本自然比其他引擎較高。不過咁,水平對向有超低重心的好處,橫置汽缸的設計亦有助抵銷活塞運動時的大部分震盪,對於轉速提升反應有很大的幫助,這個或者就是保時捷咁多年都堅持採用水平對向引擎的原因。

自然吸氣或成過去
以前,唔鍾意渦輪增壓可以揀自然吸氣,但隨着新車遂漸被turbo化,相信嚟緊嘅保時捷甚至整個歐洲新車巿場都會以渦輪增壓為主,原因是歐盟將會在2021年規定二氧化碳排放必須降至95g/km;當然,眼前這部已經被turbo化的718 Boxster S仍未達標,再睇番廢氣排放只有71g/km的Cayenne S E-Hybrid,可以肯定,今後保時捷車系的動力機關,將會以低容積渦輪增壓油電雙動能配Plug in為主。

遂漸消失的引擎聲
由原本4汽缸改為6汽缸,再放棄自然吸氣換上低容積渦輪增壓引擎,如果對這次轉變已經受不了,嚟緊還有Plug in Hybrid甚至如概念車Mission E放棄燃料引擎一律改為純電驅動,即係話,到時連家陣被你嫌棄的平四turbo聲都分分鐘無埋。
講咗咁耐,點解718 Boxster唔在舊有的6汽缸加turbo,而要換一副全新的4汽缸turbo引擎呢?先唔理6汽缸turbo到底放唔放得落今代981的底盤內,就重量而言,4汽缸turbo會比較佔優,況且全新開發的引擎在輸出上已比舊有的自然吸氣6汽缸更強,發力範圍亦更廣。

減低天然呆的機會
理論上,汽缸愈多,每個活塞分配的力距角度就愈少,曲軸運轉更順更有力,動力銜接更緊湊;不過活塞在往復運動中會不斷扮演不同程度的施力與被施力的角色,汽缸過多,反而會出現動力抵銷。至於718 Boxster雖然只用4汽缸,跟直列4汽缸的力距角度同樣是90度,但由於水平對向設計的關係,整體平衡性其實只輸比V12及L6引擎,再加上今次長測的S系,渦輪增壓採用了VTG可變渦輪葉片幾何技術,成功把難以避免的「增壓呆滯」降到最低之餘,發力範圍亦更廣闊。

慳油快了又爽了
源自911 Turbo的Variable Turbine Geometry可變渦輪葉片幾何技術,是透過液壓裝置改變噴嘴葉片的方向來控制進入渦輪的廢氣流速,高轉時,可使流路全開讓廢氣更容易進入渦輪,以降低空氣阻力來提高增壓的壓力;低轉時,廢氣流量減少,轉動葉片就會把流路收窄來提高流速。唔明,可以把佢看成是一條軟水喉,當出水量較少時,就用手按壓水喉末端收窄口徑來增加噴灑射程;水量足夠時,就放鬆讓水喉末端回復正常口徑,咁玩法,可以降低單渦輪增壓較常出現的turbo lag情況,而且這副2.5公升水平對向4汽缸渦輪增壓,比舊有同屬Boxster S的3.4公升水平對向6汽缸自然吸氣,在同一副PDK波箱傳動之下,每百公里減少了0.9L的耗油,0-100km/h還快了0.6秒。

變臉前已經好完美
我明,如果你要執着NA把聲,就算我再繼續數呢副「平四增壓」點勁點正點頂瓜瓜都係嘥氣,因為講緊唔是Mariah Carey與Whitney Houston的分別,鍾意Russell Hitchcock的高亢,就未必愛聽Bryan Adams的粗獷,呢點我好明喎,不過我只想講,趁還有機會聽到真正嘅引擎呼吸聲,就好好珍惜下了。
我試過今代981未轉裝之前的Boxster S,當年已經覺得平衡度好高,平時行街,算舒服,但會有衝動踩佢上高轉;放佢出去跑山,扭軚話入就入,彎心畀油扯住去,感覺已經好正,好難揾嘢挑剔。

極高平衡度
今次長測的718 Boxster S,平衡度與寬容度更高,慢揸輕鬆,快揸又熨貼;我建議把駕駛席調到最低,因為這個高度,pat pat是最接近車軸,操控感亦最強烈。跑上大帽山,想舒服,可以keep住二千轉左右;想強烈啲,感受下中置後驅平四渦輪增壓的超高平衡性,掌心按緊軚盤,尾龍骨貼緊椅背末端曲尺位,踩上三千二轉後,其實只係開始,上到五千六,你應該會感受到嗰種用微調油門深淺來增減轉向的極級駕駛樂趣,呢個moment,隔籬心跳正緊隨你的油門深淺而忐忑的乘客應該都會感受到這份熨貼嘅威力。當然,咁樣踩,用油係會多咗,大約每百公里平均耗油13.2L;想慳慳地又夠力,理想範圍係2,200轉,平均耗油9.6L/100km,呢個轉速,打開篷,係另一種駕駛樂趣。

2016 Porsche 718 Boxster S規格表
引擎:B4 DOHC 16V Turbo
容積:2,497c.c.
馬力:350hp@6,500rpm
扭力:420Nm@1,900-4,500rpm
傳動:中置引擎‧後輪驅動
波箱:7前速雙離合配軚盤+/-轉檔
0-100km/h:4.4s/ 4.2s (Sport Chrono)
極速:285km/h
懸掛:(前/後)麥花臣
制動:(前/後)通風碟
輪圈:20吋合金
輪胎:(前)235/35Z R20 88Y/ (後)265/35Z R20 95Y
長x闊x高:4,379 x 1,801 x 1,280mm
軸距:2,475mm
車重:1,385kg (Din)
風阻:0.32Cd
油耗:7.3L/ 100km (Combined)
廢排:167g/km
售價:$1,119,000 up

Tags

Leave A Comment

error: Content is protected !!