路遙知馬力BMW X4 xDrive20d

January 11, 2017
Comments off
19,032 Views

寶馬在港的柴油私家車種類之多,可以話係數一數二,抵港的X系更全族配備低排放節能柴油引擎,今次就首先測試這款全新的X系成員。

一向專注於on-road發展的寶馬,自從跟Land Rover來過一次深層技術交流之後,以高超機動性發展出X5,德裔的SUV之戰亦宣告展開。我知,寶馬叫自己X系為SAV,不過車型嘅嘢始終要有個歸類的,正如Sedan及Saloon,本質上係同一類別,所以我會繼續叫佢做SUV。

掀起轎跑越野之風
寶馬半隻腳踩入SUV巿場,最堅的,並非借鑒美國企業的先進調控成本技術,而是把Coupé的基因融入SUV的骨髓;雖然X6在一片劣評中橫空出世,但實際的銷售情況就狠狠地摑了輿論一巴, 仲搞到連林寶都話要出部Urus來爭奪高性能豪華SUV Coupé巿場。不過對部分駕駛人來說,X6體積偏大,車價略高,於是推出X4來填補中價X系Coupé的缺口;當然,從起初X5及X6的命名方式,已經可以看出寶馬早就有全盤計劃擴充X系家族的成員。

巧妙解決後座頭頂高度
抵港的X4,除了備有2.0及3.0兩款不同容積的汽油引擎之外,還有一款經濟型的柴油引擎;而今次長期測試的X4 xDrive20d,就配備了這副2.0公升直4柴油機器。留意番,由於X4跟X6同樣採用Coupé車型設計,所以廠方亦專登幫佢兩位改了一個新名字SAC,即Sports Activity Coupé。斜尾轎跑設計當然型,但會直接犧牲後座頭頂高度,要解決呢個問題,X4的設計師就巧妙地在不影響乘坐質素的情況之下,把後排坐墊高度降低來交換頭頂高度,所以雖然X4的車廂比X6細,但後排仍然有合理的乘坐空間。

設計用料保持水準
車廂設計,一向都唔是寶馬的強項,唔會畀到你好大驚喜,但又唔會令人覺得失望,無論設計或用料都算中規中矩,比較突出的是自動波棍,德國車來講,佢係最型最有心思。門檻與車頂高度、座椅厚度與承托力、車廂空間與行李艙高度等都非常適中,會令人覺得舒服而無需特別遷就。以時下先進的柴油引擎來講,這副2.0公升唔算超靜,但唔算嘈,配合8前速Steptronic波箱,順滑度可以,但比較起來,我會更愛寶馬那副汽油直6機器。

易揸舒適略帶運動細胞
頭中段加速,是呢副2.0柴油機器的強項,踩上2,000至3,500轉,是動力最猛的轉區。標準配備Performance Control、Servotronic、Variable sport steering、DSC動態穩定控制系統及DTC動態牽引力控制系統,為了兼顧舒適性,懸掛設定及油門敏感度變化唔會有performance car嗰種緊湊氣氛,就算啟動sport plus的操控模式,變化亦唔會過份極端,不過相比沒有Performance Control的X3來說,被降低20mm離地距的X4,表現就較為Sporty及更有駕駛趣味。

識得自動調對的轉向系統
雖然X4的體型唔算好高大,但始終是架SUV,重心比四門房車高,所以轉向唔可以太敏感,否則行車就唔夠穩定,跑山亦會較為顛簸;不過減低轉向敏感度,泊車就要扭多幾手軚。這方面,X4配備的Servotronic車速感應轉向輔助系統,可因應車速來調節轉向比例,即係如果低速泊車或窄路調頭時,轉向比會自動變小,駕駛人就唔使扭軚扭到索氣。長測5天行駛路程434公里,大部分時間使用ECO Pro駕駛模式,累積總里數錄得平均耗油9.5L/100km,始終係四驅的關係,唔算特別慳油,但因為柴油價格較平,所以每公里的油費還是比直4汽油引擎低,再加上車價比汽油版便宜,是一輛經濟又有型的中型轎跑SUV。

BMW X4 xDrive20d規格表
引擎:L4 DOHC Twin Turbo
容積:1,995c.c.
馬力:190hp@4,000rpm
扭力:400Nm@1,750-2,500rpm
傳動:前置引擎‧四輪驅動
波箱:8前速自動配軚盤+/-轉檔
0-100km/h:8.0秒
極速:212km/h
懸掛:(前)麥花臣/ (後)多連桿
制動:(前/後)通風碟
輪圈:18吋合金
輪胎:(前/後)245/50 R18 100W Dunlop SP Sport MAXX
長x闊x高:4,671 x 1,861 x 1,624mm
軸距:2,810mm
車重:1,805kg
油耗:5.4-5.0L/ 100km (Combined)
廢排:141-131g/km
售價:$537,000

Share
Tags

Comments are closed.

error: Protected Content