鬧巿中的邁亞美藍蝶Porsche 911 Carrera 4S Cabriolet

January 19, 2017
Comments off
44,333 Views

性能以外,911 C4S Cabiro最正的,是可以用遙控遠距離開關軟篷。

「Transformer 呀!。」
係我,搞到街上的小朋友大叫大嚷,因為我用緊keyless遙控對準車頭打開C4S的篷頂,車尾一大塊「U」字型尾蓋揭起再把軟篷摺入嗰下氣勢,又真係幾壓場。

貫徹經典元素
用遙控開關車篷,其實唔是得個型字咁簡單,而是上落車都比較方便,尤其這輛有後座的911;咁當然,呢隻咁性感的彩藍色,加埋911呢個唔識都知道佢係「波子」的經典造型,都係吸睛的原因。
保時捷911可以話是車壇一個異數,因為咁多年來,佢嘅造形變化唔大,原因唔是受上帝感召,而係徇眾要求;咁耐以嚟,試過996改過一次頭燈形狀咁大把,就立即被波子迷插到飛起,所以從997開始,大家又再見番佢對青蛙眼。其實由第一代901至今代991,車身紋理與形態都有唔少變化,個人認為964的身段比例最均衡最性感,而今代991就最流線最風韻猶存。

頭中段更澎湃
Facelift後的開篷C4S,車身變化唔大,但要一眼分辦出新舊版,可以認住引擎散熱蓋框格,新版直排,舊版橫排。引擎由3.8自然吸氣換上3.0渦輪增壓,輸出由400hp上調至420hp,對於這類輸出幾百匹的跑車嚟講,多20hp原本唔會好覺,但因為加了turbo,引擎經重新調校,最大輸出被提前900rpm,最大扭力輸出的轉區幅蓋範圍亦闊了,所以頭中段加速力的感覺比以前強烈。

加入後輪轉向系統
四輪驅動,本身已經好好彎,今次加埋911 Turbo的後輪轉向底擔,變成四驅四轉向,配合渦輪增壓的威力,唔只入彎更準,踩油出彎時間可以更早更狼。以sport plus模式跑山,錄得平均耗油15.1L/100km。由於整副動力系統與電摺軟篷機關都設在車尾的關係,除了削弱後座乘坐空間之外,座椅角度亦較為平直而有欠舒適及包裹力不足,劈彎之前,真係要考慮下後座乘客的感受。

一個人的浪漫
男人的浪漫,唔一定係枝竹火腩飯的,雖然C4S屬於高性能車種,但只要選擇normal駕駛模式,打開軟篷及兩邊側窗,一個人,在郊外山區一樣可以享受咬牙切齒以外的優閒寫意。不過,駛上高速公路的話,就要關上側窗及打開車尾導風板,以減低氣流撞入車廂,如果有後座乘客,就最好乾脆關上軟篷。開篷保時捷的軚盤6點位置內側有個暗掣,撳一下,軚環就會放出絲絲暖意,幾窩心,如果座椅可以有埋肩部暖風裝置,十零度打開篷,你都咪話唔棧鬼。

廿秒的顛峰
除了車身的Miama Blue不能錯過之外,另一項option設備Sport Chrono Package一樣唔可以走雞,因為加咗佢之後,唔單只可以利用設於軚盤5點位的圓形旋鈕選擇normal、sport、sport plus及individual駕駛模式之外,撳一下中央的Sport Response按鍵,引擎及波箱等就會有20秒時間進入顛峰狀態,好似「鹹蛋超人」咁,有時限的。這個設計,目的其實係方便駕駛人作短暫加速之用,例如超車,嫌廿秒唔夠喉,可以利用旋鈕直接選擇sport plus 模式。為期5天測試,大部分時間採用normal模式,巿區及公路分別錄得平均耗油10.8L/100km及9.1L/100km,以一輛逾四百匹的四驅跑車來講,算幾慳油。

Porsche 911 Carrera 4S Cabriolet規格表
引擎:F6 DOHC 24V Twin Turbo
容積:2,981c.c.
馬力:420hp@6,500rpm
扭力:500Nm@5,000rpm
傳動:後置引擎‧四輪驅動
波箱:7前速雙離合配軚盤+/-轉檔
0-100km/h:4.1秒/ 4.0秒(Sport Chrono)
極速:301km/h
懸掛:(前)麥花臣支柱/ (後)多連桿
制動:(前/後)通風碟
長x闊x高:4,499 x 1,852 x 1,293mm
軸距:2,450mm
車重:1,580kg
油耗:8.0L/ 100km (Combined)
廢排:184g/km
售價:$2,553,000 up

Share
Tags

Comments are closed.

error: Content is protected !!