不温不火Mercedes-Benz C 250 Coupé

February 9, 2017
Comments off
35,442 Views

唔想得兩個位,但又要有跑車外形;輸出唔使好勁但又要動力隨傳隨到,要順滑舒適得嚟,又不失硬朗放縱的一面,咁嘅要求,會唔會高咗啲呢?

要揾一部咁嘅車,其實遠在天邊近在眼前,只是人們慣常用佢同跑房車比較,於是變成少了一個後座,出入唔方便,輸出又唔夠標青的兩門四座轎跑車。

夢醒時分
或者曾幾何時,孻叔送畀張偉杰嗰部MR2是你夢寐以求的「尖Car」,不過當你發現放蕩不羈的歲月被神偷擄走了,家庭責任又重了,要keep住這份激情,有人會揀四門跑房車,次選係兩門四座轎跑車。

降低車高
都啱數的,得兩隻門,後座乘客出入係會有啲唔方便,加埋Coupé的斜背設計,後座空間會好受影響,所以這類兩門四座轎跑車一直都唔是巿場主流車種。今次長測的C 250 Coupé,明明是由四門五座C-Class Sedan開發出來的兩門四座Coupé,點解外形會瀟灑咁多?原來車身連同離地距都被降低了,總計比房車版矮了37mm,加埋斜背,想唔型都唔得。

隱藏鏡頭
個人認為這款C Coupé的車身比例,是平治旗下轎跑車之中比例最均衡。不過要靚,還是有代價的,為了平衡視覺比例而加長的車門,對於窄到阿媽都唔認得的停車場,就要先落客後泊車。勁似GLC Coupé的車尾設計,入了R波,廠徽會自己揭起露出泊車鏡頭,呢個咁有特務feel的設計,已先後用在GLE Coupé及GLC Coupé的身上。

最佳組合
坐上車, 安全帶會自動送到去你的肩膊位;唔使好似《他來自江湖》裡面阿鑫淼咁大呼小叫喎,平治呢項功能早在80年代已經用緊,目的係針對這類長車門,B柱被後移的兩門轎跑車。C 250 Coupé的動力心臟是2.0公升渦輪增壓的M270引擎,雖然這副機器唔會令人熱血沸騰,但CamTronic進氣活瓣可變升程系統、只消1毫秒就可作出4次點火及多次噴注的BlueDIRECT技術,可以話已把燃油效率發揮到最大,排放降到最低,加埋副7G Tronic Plus全自動波箱,呢個配搭,我認為係呢代平治車系之中最踏實中庸的黃金組合。

中庸之道
揸咗4日,發覺這部C 250 Coupé都幾啱我這類一家四口的小家庭,尤其我那頭手多多未足5歲的小魔怪,坐在後排,完全唔使擔心佢會亂搞門窗掣,可以專心揸車。駕駛選擇模式變化鮮明,但又唔會過於神經質;離地距被調低15mm之後,懸掛比Sedan稍硬,路訊清晰咗,舒適還是有的,但無咗回軚時嗰種虛浮感,懸掛反應亦敏捷咗。用ECO mode在巿區及公路行咗178km,錄得平均耗油6.4L/100km;轉用進取啲嘅Sport mode跑山,劈彎算幾乾淨俐落,速度唔算好快,但加速與轉向比例過程流暢,平均耗油亦只升上9.6L/100km,以一輛兩門四座轎跑車來講,在房車與跑車之間找到了中庸點。

Mercedes-Benz C 250 Coupé規格表
引擎:L4 DOHC 16V Turbo
容積:1,991c.c.
馬力:211hp@5,500rpm
扭力:350Nm@1,200-4,000rpm
傳動:前置引擎‧後輪驅動
波箱:7G-Tronic配軚盤+/-轉檔
0-100km/h:6.8秒
極速:250km/h
懸掛:(前)四連桿/ (後)五連桿
制動:(前/後)通風碟
輪圈:18吋合金
輪胎:(前)225/45 R18 95Y/ (後)245/40 R18 97Y Bridgestone S001
長x闊x高:4,686 x 1,810 x 1,405mm
軸距:2,840mm
車重:1,540kg
油耗:5.4-5.9L/ 100km (Combined)
廢排:125g/km
售價:$548,900

Share

Comments are closed.

error: Content is protected !!