貪得無厭 Volkswagen Tiguan 330 TSI 4MOTION Trail

August 9, 2017
13,809 Views

如果可以變得更好更完美,有時等耐少少都係值得的。

「禍莫大於不知足,咎莫大於欲得。」貪是最大的罪過,老子係咁話的。
不過咁,我認為無論知足還是貪欲,都有分時間及動機的,當中亦牽涉「價值」,所以懶惰可以被粉飾為知足,上進都可以變成貪念。其實人類的文明,本質都是建基於不知滿足,好多嘢,唔是非白即黑的。
到底我想講乜?咪就係想講下今次長測的Tiguan2囉!

九年之後
3年一次facelift ,6年一次all new,唔是行規,但多數新車都係跟住呢個時間表去配合開發周期,久而久之就變成規律。不過第一代Tiguan由2007年問世至去年推出第二代,足足花咗9年時間,如果唔是出現結界,咁到底係發生乜嘢事呢?原因可能跟車廠唔捨得第一代Tiguan平均每兩分鐘賣出一架有關,又或者花多啲研究時間,希望帶畀大家一部配備更加精良的新車。

同級設備最多最齊
是的,有邊個唔想買部新車番嚟係同級設備最多最齊吖,問題係,好多時標準配備唔多,話就話有option設備任你揀,但講緊唔是魚蛋豬皮雞翼尖每款5蚊喎,咁樣加下加下,車仔麵都隨時百幾蚊一碗啦!
貪得無厭對人類嚟講,就算唔是賴以維生的信仰,都是一種與生俱來的習慣;好似汽車天窗咁,用嘅時間唔多,但無的話,又會覺得少咁啲嘢,如果你好著重汽車設備的話,咁第二代Tiguan就好值得你留意番了。

輕了硬了
如果你從未踏足過第一代Tiguan的車廂,未必會感受到全新MQB底盤已經令新一代Tiguan2 增加了高達77mm軸距,長度及闊度亦分別增加了60mm及30mm,咁當然跟大佬Touareg比較都仲有一段距離,但後座空間就明顯闊落咗好多。最正係40:20:40的後座設計可以向前移動180mm,令行李艙的空間使用更加彈性;如果615L都唔夠你用,只要瞓低後排,容積馬上暴增至1,655L,搬屋都仲得。唔好以為底盤大了就一定重,最新的沖壓技術唔只強化了車體的抗扭能力,重量更比上一代輕了足足82kg。

跑車化波箱
新一代Tiguan主要分為3個版本,包括前驅的280 TSI、四驅的330 TSI及頂級380 TSI;至於今次長測的330 TSI,引擎採用編號EA888的兩公升渦輪增壓,雖然跟現行的Golf GTI是同一副機器,但因為屬於Gen. 3B節能版本,所以輸出亦由230ps下調至180ps。傳動機關係4MOTION配7前速DSG波箱,跟新一代Audi TT RS採用同一副編號DQ500的濕式雙離合器波箱,可承受最大600Nm的扭力。

堅爬得
雖然呢副MQB底盤具備極高的貼地性與寬容度,又有自選駕駛模式,0.31Cd的風阻系數亦算出色,但為了兼顧舒適與慳油,動力輸出被調校得較為線性,所以唔好諗住當佢跑車咁樣揸。200mm離地距、25度的爬坡進入角度加埋操作非常簡便的4MOTION Active Control,我知你未必用得着,但要知道37萬的歐洲車想有啲咁齊的越野裝備真係只得呢部Tiguan2。

全面數碼化
中控台全彩高解像多功能數碼顯示屏除咗一般選台選曲導航油耗之外,還有儀表圖像顯示渦輪增壓值、G-Force值、引擎輸出數據、單圈計時、轉向角度、水平角度、指南針及360度鳥瞰泊車模擬影像等,儀表板亦改用了相同的數碼顯示。
一般個人化的記憶功能只有座椅及駕駛模式,而且是兩個獨立系統;為咗配合不同駕駛人的需要,新一代Tiguan2更把個人記憶範圍擴大到冷氣温度及風力、睹後鏡角度、儀表顯示模式及駕駛模式等十多項功能,只要預先調校好各項系統之後,把設定儲存在系統的個人帳戶內,再把帳戶輸入到感應鑰匙便可,咁樣系統就會按照不同的鑰匙設定,每次在解鎖及啟動引擎之後自動調整預設的記憶,雖然唔是甚麼高科技,但呢種咁方便的設備,就算過百萬的豪華房車都未必有。

無微不至
標準配備主被動安全設備包括6個安全氣袋、ABS、ESP車身穩定控制、XDS主動式限滑差速、MCB二次碰撞預煞、TPMS胎壓偵測、疲勞駕駛警示及Active Bonnet上彈式行人保護引擎蓋等。泊車時,除咗會自動啟動360度鳥瞰鏡頭之外,亦可以交由半自動泊車系統,按下引擎start/stop下方附有軚盤圖像的P掣,先選擇S或L位,再按照系統指示步驟,駕駛人只需控制檔位及制動腳踏,系統就會自動操控軚盤轉向泊入預設的車位。「濕平」完無手打開行李艙蓋,車尾又有感應式開關尾門,只要袋住感應鑰匙在車尾輕輕一掃就可以自動打開;唔鍾意全景電動天窗的話,硬頂又設有頂置式儲物格,設備非常體貼。唯一要留意的,係前座兩側門板儲物格,基於門板設計的關係,後部1/3位置會被門板遮蔽形成一個暗格,汽車一開一停,細微的物件就會好易跌入呢個黑洞。

雙離合唔同全自動
值得留意番呢類dual-clutch半自動波箱跟使用torque converter的傳統全自動波箱由於結構不同,所以操作方式有小小心得同大家分享。雖然唔踩迫力連解3檔行車都會好順,但呢個動作會在瞬間提升波箱温度,尤其與低容積引擎相配的乾式DSG雙離合器波箱,想波箱襟行襟玩,每次手動降檔之前,應先輕力踩制動腳踏稍為減慢車速才降檔;停車等候時間超過半分鐘,就最好拉上泊車手掣再拍入N檔;避免在塞車時,長時間以低於每小時5公里的車速前進。揸咗Tiguan2 五日,以ECO模式行駛錄得巿區平均耗油10.5L/100km,公路8.7L/100km,四驅車來講算好慳油;在VW的車系之中,我認為呢部Tiguan2 330 TSI係設備最齊售價最物超所值。

Volkswagen Tiguan 330 TSI 4MOTION Trail規格表
引擎:L4 TSI Turbo-Charger
容積:1,984c.c.
馬力:180ps@3,940-6,000rpm
扭力:320Nm@1,500-3,940rpm
傳動:前置引擎‧四輪驅動
波箱:7前速雙離合半自動配軚盤+/-轉檔
0-100km/h:7.7秒
極速:208km/h
懸掛:(前)三連桿/ (後)四連桿
制動:(前)通風碟/ (後)實心碟
輪圈:19吋合金
輪胎:235/50 R19 Pirelli Scorpion Verde
長x闊x高:4,486 x 1,839 x 1,632mm
軸距:2,681mm
車重:1,730kg
油耗:7.4-7.3L/ 100km (Combined)
售價:$369,980

Share
Tags

Leave A Comment

error: Protected Content