如果可以 Mercedes-Benz C 200 Cabriolet

November 23, 2017
37,752 Views

氣温21.5度,軟篷連側窗一齊打開,再開埋Airscarf暖風系統,在秋風中奔馳,係駕駛的最高享受。

以前想擁有一輛平治開篷車,基本入場費是56萬的E 200 Cabriolet。開篷C仔出現之後,門檻低咗少少,同級四座開篷房車之中佢唔算平,但講外形講內裝,我覺得佢係最優雅。

轎跑外形
咁當然,靚唔靚,係好睇個人口味的。我覺得開篷車的線條太硬太直的話,尤其車尾,會唔靚;曲線太長太圓潤,睇起嚟又會比較柔弱,失咗男人嗰分剛毅味。
有啲車廠會直接用兩門Performance改成Cabriolet,呢類開篷車,無論閂篷定開篷,造形多數都比較生硬唔多協調。至於今次長測呢部C 200 Cabriolet,車身是由C Coupé發展過來,所以形態上會優雅啲。

公路要有佢
如果你都睇中開篷C仔,記住一定要選配AIRCAP前後擋風板,因為呢套裝備可以減少氣流捲入車廂; 不過兩塊風擋的賣相就稍為突兀,所以我會留番highway先至用。個人認為開篷時間唔一定要快,合理就得了,最重要反而係可以在合理時速之下邊行邊開篷,只要揸過開篷車就會明。

温暖裝備
秋涼的日子關掉冷氣打開篷頂,日間有太陽伯伯照住,温度啱啱好;覺得有啲凍,可以啟動發熱坐墊,想再warm啲,頭枕仲有Airscarf三段調節系統可以為肩膊吹送暖氣,呢個設備對開篷車嚟講真係正到暈。達S-Class級數的軟篷物料,隔音質素相當於C Coupé逾8成功力,如果可以有埋遙控操作開篷機關,閂篷後識得由暖氣自動切換成冷氣,又可以識別駕駛人慣常的閂篷路段而自行閂篷,咁就正爆了。

引擎波箱天作之合
雖然C 200 Cabriolet跟較早前長測的SLC 200都係採用同一副相同輸出的兩公升直四渦輪增壓引擎,但C 200 Cabriolet把聲就明顯柔和啲內斂啲。咪睇佢得184hp就以為佢無乜力,其實只要keep住1,500轉左右已經好去,9前速波箱都好順滑,順住行,80km/h行7波,之後時速每上10km/h就跳升1檔;踩上2,100~3,000轉的動力帶,加速力唔算澎湃,但好夠用,不過我嫌ECO mode的油門反應太遲鈍,Sport mode又太過進取,所以長測4天都係keep住用Comfort mode,公路平均耗油6.8L/100km,公路與巿區混合路段則平均8.6L/100km,非常接近廠方公布的數據。

Mercedes-Benz C 200 Cabriolet規格表
引擎:L4 DOHC Turbo
容積:1,991c.c.
馬力:184hp@5,500rpm
扭力:300Nm@1,200-4,000rpm
傳動:前置引擎‧後輪驅動
波箱:9G-Tronic半自動配軚盤+/-轉檔
0-100km/h:7.8秒
極速:233km/h
懸掛:(前)四連桿/ (後)多連桿
制動:(前)通風碟/ (後)實心碟
輪圈:18吋合金
輪胎:(前)225/45 R18 / (後)245/40 R18 Bridgestone Potenza S001
長x闊x高:4,686x 1,810 x 1,409mm
軸距:2,840mm
車重:1,665kg
油耗:6.2-6.6L/ 100km (Combined)
廢排:143-133g/km
售價:$528,000

Share

Leave A Comment

error: Protected Content