再次電爆中環 – 2017 HKT Hong Kong e-Prix

December 6, 2017
Comments off
11,405 Views

FIA Formula E 2017-18賽季再次喺香港展開, 今年已經來到第四屆, 而香港站仲係Double Header, 星期六、日連跑兩個回合。

嫌我長氣都要再講一次, Formula E點睇都係一場All-Star Race。 所有車手都大有來頭, 除咗莫他拿同羅辛基斯兩位澳門三級方程式冠軍之外, 佢地大部份都曾經係一級方程式打滾過, 亦有跑過、甚至贏過利曼24小時, 真係粒粒巨星!

星期六排頭三位車手Jean-Eric Verne, Sam Bird, 以及Nick Heidfeld, 圈速只差不到0.03秒! 星期日排位賽圈速更快, 由羅辛基斯做出1:02.836, 比星期六排頭位嘅Nick Heidfeld再快0.732秒。

名宿之子8撞8, 再跑第8

星期六早上排位賽中, 駕駛雷諾e.Dams 8號車嘅「小保魯斯」Nicolas Prost, 喺8號碼頭前撞欄, 左前翼撞毀, 大量碎片四散之餘, 扯甩咗牆上一塊家鄉品牌米芝蓮廣告, 尾隨嘅Jérôme d’Ambrosio仲兜口兜面食中, 拖住一條長長嘅藍色彩帶行咗個幾圈, 兩位今次真係老尷到一個極點。

星期六賽事嘅冠軍Sam Bird, 星期六入Pit停車時因地面有沙石而鎖死前轆, 差D撞到幾位車隊工作人員, 結果被判罰遊車河刑 – Drive through penalty, 仍能夠繼續領先, 順利勝出星期六賽事。

舊年發生多宗事故嘅民耀街與金融街十字路S彎, 今年有所改動。

入彎位被推前廿餘米, 金融街部份亦加長咗, 令兩個彎度都變得急咗好多, 車手唔可以舊年咁快出入, 令難度同安全性同時被提升, 據聞去年車手們都盡電殺入, 但今年相信要重收、煞住入啦! 話雖如此, 星期六正賽起步後只係分零鐘, 亂局之中喺金融街發生碰撞, 引起「交通擠塞」, 大會出示紅旗暫停賽事。

今年花生特別多!

澳門大賽車, 每年都會為咗安全將所有望到跑道嘅位置用板封起, 仲封得好密實, 香港跟隨呢個實在做法不足為奇 😔 試想吓… 如果被免費觀眾塞住晒D通道, 會堆積幾多人? 有起事上來, 救援人員點入去做野? 想免費睇, 都係睇電視直播啦👍 仲有廣東話旁述

唔止通往天星碼頭嘅天橋, 仲有部份建築物都封起玻璃窗, 謝絕車迷, 但係生果舖同舊年一樣咁大方喎, 唔介意車迷駐足觀看。 當然, 為安全起建, 店方照舊喺離玻璃大約三米架起欄杆, 廢事車迷迫爆玻璃。 貓貓多口問過生果舖職員, 驚唔驚有人偷佢地D貴價生果? 哈! 佢地都信心十足, 仲話防盜措施就算平日都做得好徹底, 未驚過咁話喎! 犀利!

話說星期六紅旗後等待重新起步時, 龍和道髮夾彎發生空難! 從天而降送大禮! 失驚無神醒你航拍機一隻, 接到你就發啦😅 中頭獎分分鐘要見閻羅王!

舊年已經拉咗三個喺賽場附近玩航拍機嘅「機師」, 今年大會同警方都有再次呼籲, 點知都再來三單, 其中一名「機師」係內地遊客。 事源一隻航拍機可能絆到吊臂車嘅一條電線, 電光火石間失速墮地, 目測當時高度大約有兩層樓咁高, 好彩隻機跌入欄桿後面, 頭獎無人中, 二獎一注中… 當眾人雞飛狗走期間, 一名外籍攝影師褪後行時跌倒, 稍為擦傷, 同時責爛一枝閃光燈, 亦整跌咗另一位外籍攝影師嘅相機, 好彩只係機身花咗, 無跌壞。 警察叔叔迅即到場調查, 無人當場投案承認責任, 當時大約係下午3:15。 大家用吓個腦, 諗吓如何隻機跌中近200km/h嘅賽車, 加上隻機下墜嘅衝力, 個momentum同energy大得幾緊要? 連外國傳媒都有報導, 今云香港真係羞家囉!

本來冠軍的壽星仔Daniel Abt,開心數小時後傳來噩耗 😰 賽後驗車發現, 車上兩個封條號碼不對, 決定取消其冠軍成績。 唉… 如此的一份生日禮物, 畢生難忘! 陰功豬🐖

點解個摩打同Inverter唔係原來果個? 唔係技術上嘅問題,而係行政上嘅一個小失誤, 令Audi車隊付上沉重代價。 車隊總監Allan McNish表示, Daniel架車並無因呢一個錯誤而有任何得益, 起初打算提出上訴, 但最後經內部調查後, 証實真係程序出錯, 所以無奈放棄上訴, 接受判決。 成績方面, Mahindra車隊嘅羅辛基斯升上一位,積架車隊嘅Mitch Evans可以企埋上凳仔得第三。

家陣係唔係玩到咁大先? 🤣

曾經有議員話過,  跑道係公眾道路, 參賽車輛須要遵守速度限制, 即係唔可以快過50km/h。 希望外國傳媒唔識聽中文啦, 如果唔係, 就係又一個國際大笑話啦!

 

 

 

Share

棍波死硬派, 菲林攝影死硬派, 自問前途死路一條… 死硬!

Comments are closed.

error: Protected Content