樣樣都啱啱好 Mercedes-Benz E 300 Coupé

January 13, 2018
23,186 Views

對我來講,E 300 Coupé是近乎完美,只欠一把潤滑的嗓子。

好想知道,如果我買了一部改裝車,唔好彩被警察捉到喎,我可唔可以話幾年前買返嚟嘅時候已經係咁,因為自己工作節奏特別緊張,冇時間就有否改裝的問題而徵詢專業人士意見,事件只係安排未夠周全,警覺性不足,政治敏感度低,沒有任何隱瞞,唔好小事化大,畀啲空間我處理問題。我咁特殊的情況,唔知係咪合情合理呢?

改裝嘅原因,當然係追求心目中的完美,不過喺香港改裝同僭建一樣,除非入紙申請獲批,否則隨時觸犯法例,所以如果你能夠揾到一部唔使改都已經好滿意的車,咁真係恭喜晒。

街車嚟講,我鍾意線條修長得嚟要圓滑,輪廓要清晰,嗰啲厊厊厏厏誇誇張張的包圍及餐枱大尾翼通通唔啱我口味。今次長測呢部E 300,屬於兩門四座的轎跑型號,配上19吋AMG的5-twin-spoke light-alloy輪圈,造形正正係我鍾意嗰類。

車廂布置年輕得嚟夠穩重,電鍍選件與比例啱啱好,黑色雲石與木紋飾件有種另類貴氣。有人問過我,點解中控台個12.3吋巨芒唔是觸控式,仲要揾嚿嘢篤下扭下咁好鬼out。即是咁,觸控屏幕喺操作上係方便的,不過篤完一輪之後,屏幕就會黏滿指紋污漬,跟住你就要好似手上部智能電話咁用衫用巾用紙起世抹呀抹,畀我揀,我就寧願用個掣扭下擰下。

今代E Coupé用番自己E-Class底盤之後,車廂空間明顯比上一代借用C-Class底盤時闊落好多。好多人都唔係咁like兩門車,尤其有咗小朋友之後;不過我就剛剛相反,無咗後面兩度尾門就唔使擔心兩嚿叉燒仔亂咁開門撞花人哋架車,所以兩門四座的布局好啱我。

動力心臟是編號M274的兩公升直四渦輪增壓配9G-Tronic,輸出245hp,戰鬥力唔係洪水猛獸級,但呢個輸出在Comfort模式下,剛好做到慳油又有性能;頭中段的加速好爽,底盤及引擎的調校明顯比上一代sporty,唯一缺點係四汽缸的聲底較為乾涸,無咗上一代V6嗰種甜美濕潤,不過行少兩個汽缸就真係慳油咗好多。經過4日測試,用ECO mode行巿區及公路混合路段,在平均時速44km可以做到8.1L/100km的耗油量;切換至敏感度最高的Sport Plus跑山,耗油量會增至12.3L/100km,要性能,點都要付出少少代價的。

Mercedes-Benz E 300 Coupé規格表
引擎:L4 Turbo
容積:1,991c.c.
馬力:245hp@5,500rpm
扭力:370Nm@1,400-4,000rpm
傳動:前置引擎‧後輪驅動
波箱:9G-Tronic全自動配軚盤+/-轉檔
0-100km/h:6.4秒
極速:250km/h
懸掛:(前)四連桿/ (後)多連桿
制動:(前/後)通風碟
輪圈:19吋合金
輪胎:(前)245/40 R19/ (後)275/35 R19 Michelin Primacy 3
長x闊x高:4,826x 1,860 x 1,430mm
軸距:2,873mm
車重:1,685kg
油耗:7.0-6.4L/ 100km (Combined)
廢排:160g/km
售價:$749,000

Share

Leave A Comment

error: Protected Content