驚驚哋返唔到屋企 Renault ZOE Z.E. 40

April 28, 2018
31,961 Views

續航力達400公里的ZOE Z.E.40,開住冷氣塞下車,我哋預咗一定會打折,問題是,到底跟實際情況相差有幾遠。

對於由車廠提供的平均耗油量,你或者不會太過在意,因為即使「事與願違」,都可以用錢去解決問題。但電動車就唔同了,因為充電站有很多掣肘,而且充電時間遠比入油時間長,行到差不多無電,你就會開始擔心返唔到屋企,所以有負載之下的實際續航力就非常重要。

動力續航力全面加碼
呢部嗰樣嬲爆爆又有啲cute的ZOE,原本用22kWh電池,摩打輸出88hp,續航力240km;經過改良之後,鋰電池容量增至41kWh,摩打輸出加到92hp,續航力提升至400km,不過車價都由33萬變成近37萬。

充電位可遇不可求
講真嘅,就算續航力可以去到1,000公里都好,始終都有需要充電的一日。如果諗住靠晒時租停車場的充電位去做補給,以為泊低部車插好電掣走去睇場戲食個飯返嚟就餵飽嚿電,咁你就諗得太完美了,事關充電制式有日式有歐式有美式,唔同制式用唔同插座,當中又有分慢、中、快充,充電時間由兩粒鐘至一日不等;當你揾啱合你座駕制式的停車場都唔好開心住,因為通常充電位唔多,車位full咗就唔知要等幾耐,最激氣就係唔知點解有啲電油車會泊咗入充電位,所以最好就係屋苑有個私家位,搞個私人中速充電裝置,每晚泊好車充電7至8小時,第二朝起身就用得,唔使為咗充電問題而破壞行程影響心情。

成本最高係電池
從代理手中接過呢部ZOE Z.E.40,儀表板顯示現有電量可行駛380km。車廂,觀感有啲似smart,你可能會覺得,以近37萬呢個價唔應該咁膠,不過唔好誤會車廠夾埋代理齊齊滾你,只係大部分成本都花晒落嚿鋰電池;想內櫳潮啲醒目啲,買車時,可以在配色方面着手。中央門鎖的解鎖掣放喺中控台上方,音響聲量調校就放在軚盤後方3點位,揸開德日韓車就要習慣一下。

自選三種地外怪音
儀表板可自選顯示模式,一邊揀,指揮燈的訊號聲會跟住變,幾頂癮。除咗打指揮燈或死火燈的「嗒嗒」聲之外,低速時,仲會發出一把怪聲,記得Tom Cruise嗰套《War of the Worlds 強戰世界》,裡面啲三腳外星機械獸移動時就係發出呢種怪聲。唔like的話,可以長按住駕駛席右下方的聲效掣,你會先後聽到Pure、Glam及Sport三種聲效,揀啱就放開手;不過呢三種聲都超怪,唔屬於地星的,是法國音樂與聲學協調研究學院 IRCAM的聲學專家們合力鑽研的成果,目的係喺時速30km之下,通知行人有「移動物體」靠近,避免意外發生,因為電動車太靜了,如果真係三種聲你都唔like,每次開車前都可以off咗佢的。

忌急燥狂野駕駛風格
座椅用料輕身,調校全手動,目的係要減磅,提升續航力。平放喺車底的鋰電池組是LG Chem出品,比舊款的21kWh重了16kg,全部通過火攻水淹撞擊測試,有乜依郁又會自動cut電,確保唔會短路爆炸。摩打輸出92hp,飛天遁地無佢份,大腳質落「電門」會好快,但唔是速度,而是耗電量,不過只要你畀啲時間同部車溝通下,就會發現某個速度某個情況的加速力都有啲料到。

慳電一定揀ECO
卡片型遙控車匙係Renault的特色,上車之後,鍾意袋喺身或者插入中控台下方卡槽隨你鍾意,炎夏又可以用佢遙距啟動冷氣系統。第一日,唔知埞,用Normal mode行車,正常車速行50km,儀表電量顯示用了80km,上斜仲誇張,行1km可以唔見咗7km電量,就算你有隻黃金右腳都無用。轉用ECO mode,「電門」敏感度會弱咗好多,落斜放開「電門」,感覺似自動波箱由5波拖落3波,作用跟煞車制動一樣,可以回收動能幫電池充電。

愈揸愈慳電
揸咗兩日,未試過可以在巿區停車場成功充電,睇住電量係咁跌,你都咪話唔得人驚。長測第3日,開始掌握到「滑翔」回充的竅門,最好成績可以做到行50km只耗56km電量,所以長測去到第4日,電量剩低118km,個心定咗好多。交車時,4天總共行咗262km,餘下電量仲可以行86km。

先要搞好私人充電位
整體嚟講,ZOE的操控感幾紮實,公路彎路都好定,軚感一般,駕乘感中規中矩,但因為電池存放車底令地台升高,出入後座要小心撞頭。至於廠方公布的400km續航力,對香港的路面情況及亞熱帶氣候嚟講就比較樂觀,個人認為實際續航力大約在330至360km之間。比較重要的是充電問題,由於未有統一充電制式,加上大部分巿區停車場的充電設施太少,所以最好都係有個私家充電位,再配合埋ZOE的續航力,咁就揸去邊都唔使驚。

Renault ZOE Z.E. 40規格表
摩打形式:繞線同步
電池:41kWh鋰離子電池
最大馬力:92hp@3,000-11,300rpm
峰值扭力:220Nm@2,500rpm
續航距離:400km (NEDC)
傳動形式:前置摩打‧前輪驅動
傳動系統:單速直接驅動
0-100km/h:13.2秒
極速:135km/h
懸掛系統:(前)麥花臣/ (後)扭力桿
制動系統:(前)通風碟/ (後)鼓式
輪圈:16吋合金
輪胎:195/55 R16 Continental ContiEco Contact5
長x闊x高:4,084 x 1,730 x 1,562mm
軸距:2,588mm
車重:1,480kg
售價:$368,800

Share
Tags

Leave A Comment

error: Protected Content