好玩得 Audi A3 Sportback 35 TFSI

May 23, 2018
52,589 Views

揸咗四日,諗極都唔明,點解一部咁好玩的車,偏偏無軚盤轉波。

無錯,呢款A3 Sportback係跟第7代Golf用埋同一副底盤,同一副1.4公升渦輪增壓引擎,但係大家調校唔同,設備唔同,所以揸上手都有啲唔同。

掀背優勢
公主道3波無敵手的鈴木辣椒仔,彎路之王的標致306,呢類充滿傳奇又極具挑釁味的名字,相信大家都應該聽唔少,呢啲清一色都係掀背車仔,可以有咁標青的表現,全靠輕,軸距與跨距比例啱啱好,所以起圍快,彎路靈活。呢類掀背車仲有一個好玩的原因,就係輸出唔大,容許有較多時間踩盡油門,可以提早畀油出彎,再加埋頭轆車輸出直接兼容易操控,就算出現輕微失控,只要縮一縮油就搞掂。

底盤調校熨貼
科技進步咗,呢類掀背車自然更快更定更易發揮。今次長測呢部A3 Sportback 35 TFSI,輪距、馬力、扭力及0-100km加速時間都跟採用相同底盤引擎波箱的VW Golf 280 TSI GT一模一樣,車重亦相當接近,我甚至懷疑連坐緊張櫈都係同一張。行車表現,兩部車都係超級貼服,分別係A3的懸掛調校偏向舒適啲,軚感輕盈啲,所以好自然會覺得A3比較豪華。

布置簡潔
性能以外,兩款車完全係自成一格。
我幾like A3的車廂設計,布置簡單得嚟,又唔會令人覺得空洞,較特別的地方,係可以把顯示屏完全收入中控台內,令車廂更簡潔;不過引擎start/stop及drive select依舊沒因應右軚巿場的需要而作出合理調動,操作唔夠方便。

電子裝置提升極限
正如前文提過,呢類掀背車,雖然馬力唔大,但勝在夠輕,夠靈活,傳動直接,容易發揮,所以跑山會幾好玩的。A3 Sportback 35 TFSI唔只有齊上述優點,仲有埋ESC電子穩定控制系統、EDL電子防滑差速及 ASR加速防滑系統呢類電子輔助裝置,極限自然更高。

紮實有溝通
跑山,最啱feel一定係sport mode,波箱延遲轉檔再配合引擎本身寬闊的最大輸出轉區域,無論踩油動作是漸進、突發,還是收油返腳再踩,感覺都非常緊湊,而且頭中段都好有速度感。軚感,唔算好強烈,但轉向好準,話入就入;底盤紮實,溝通感唔錯,遲迫入彎或者早踩出彎都畀到充足信心駕駛人,不過偏偏就無得玩軚盤轉波,有啲掃興。呢副偈除咗緊湊好力之外,仲配備Cylinder on Demand系統,只要情況許可,系統會自動截斷兩個汽缸的燃料供應,減低耗油。長測4天,ECO及Sport mode先後錄得平均耗油5.2L/100km及10.5L/100km,綜合耗油跟廠方公布的數字非常接近。

Audi A3 Sportback 35 TFSI規格表
引擎:L4 FSI Turbocharged
容積:1,395c.c.
馬力:150hp@5,000-6,000rpm
扭力:250Nm@1,500-3,500rpm
傳動:前置引擎‧前輪驅動
波箱:7前速S-Tronic雙離合半自動
0-100km/h:8.2秒
極速:220km/h
懸掛:(前)麥花臣支柱/ (後)四連桿
制動:(前)通風碟/ (後)實心碟
輪圈:17吋合金
輪胎:(前/後) 225/45 R17 Dunlop Sport Maxx
長x闊x高:4,313 x 1,785 x 1,426mm
軸距:2,637mm
車重:1,240kg
廢排:126g/km
油耗:5.0L/ 100km (Combined)
售價:$283,900

Share
Tags

Leave A Comment

error: Protected Content