禾桿冚珍珠 – 8 Gallery, Torino

July 5, 2018
Comments off
15,850 Views

斷估….. 貓貓從來未試過介紹商場, 不過今次, 貓貓決定要破例, 為大家介紹一個商場。

呢個商場相當長, 由頭行到尾, 等如由信和行到去朗豪坊。 有D咩特別嘅舖頭? Sorry, 唔見有咩特別。

食肆林立, 有多間餐廳任君選擇。 嫌貴? 仲有一間食著名美國菜, 相信會符合你筆直所限。

來到意大利想掃貨? 睇怕你搵錯地方啦! 咁究竟呢個商場有咩特別呢? 貓貓起初去到都搵唔到乾坤😞 但又唔想空手而回, 再即場拜訪姓谷嗰位哥哥, 終於得到前人指點迷津, 找出前人嘅步伐, 順利搵出呢個商場嘅精要所在。

先為大家解開迷底, 呢座建築物就係當年FIAT嘅舊廠房, 由1923至1982年間, 超過80個FIAT型號就在此處瓜瓜墮地, 當中包括1936年出品嘅重要型號 Topolino。

自從FIAT嘅生產分別轉移去幾間新廠房, 呢棟位於都靈市中心, 橫跨幾個街口嘅巨型舊建築物, 其後被活化成商場+寫字樓之外, 仲有兩間酒店。

佢會唔會係全世界最大嘅建築物? 聽到呢個問題, 有班美國佬即刻舉手答唔係! 因為波音飛機喺西雅圖Everett專責組裝747、767、777、787嘅廠房, 先至係全世界體積最大嘅單一建築物, 佔地0.398平方公里。 點解FIAT呢棟Lingotto廠房唔算大? 可能因為建築物係環型佈局, 中間係空框框嘅, 現為一個花園。

最引人入勝之處, 並唔係咸豐年廠房嘅身份, 而係當年FIAT嘅試車跑道, 至今仍然保留得原汁原味。 條跑道喺邊? 就喺商場嘅天台!

呢條跑道, 係1969 年嘅電影The Italian Job嘅實景, Michael Caine同兩個同黨揸住三架Mini Cooper, 載住由中國偷番嚟嘅一批金條而被追捕, 喺呢道拍咗一場流芳百世嘅摙車戲。

網絡圖片 (Credit: FIAT Group)

Lingotto廠房選址臨近鐵路, 原料由鐵路送至幾個街口外嘅火車站, 由零件遂件遂件裝勘成車, 由地面一直升上二三四樓, 最後完成品喺天台跑道試車。 跑道嘅鑊型設計, 可以俾車輛安全咁以90km/h行駛。

試完車係咪搭𨋢番落地下? 冇咁先進! 😅

建築物兩頭都有旋轉斜路, 十足青衣某商場嗰個咁, 部份旋轉斜路開放俾遊人參觀試行。

言歸正傳… 如果想親自參觀呢條咁傳奇嘅測試跑道點去? 問得好! 前文提及, 貓貓去到呢座商場, 根本搵唔到指示點去天台! 全靠姓谷嗰位哥哥話我知 , 有一位來自英國嘅先生教路, 去戲院後面嘅畫廊專賣店, 入面有架𨋢上四樓畫廊入口, 呢間畫廊叫Pinacoteca Giovanni e Marella Agnelli。 點解個名聽落咁熟嘅? FIAT嘅創辦人咪就係叫做Giovanni Agnelli呢位意大利富豪囉!

上到四樓, 只要你付出十Euro買咗畫廊嘅門票, 行出門口就係呢條傳奇嘅天台試車跑道。 你亦可上到五樓, 由畫廊落地玻璃以高角度觀看跑道, 同場加演18世紀名畫數張。 藝術館內不陋都嚴禁攝影, 不過由窗口影出外面, 就不在此限。

現稱8 Gallery嘅商場, 就位於Torino嘅心臟地帶, 搭地鐵可以喺Lingotto站落車。 點解用個「8」字? 唔係因為有中國注資… 而係「Lingotto」嘅「otto」, 正正就係意大利文個「八」字, 就此而名。 揸車嘅朋友, 只要係商場消費滿若干金額, 就可依照香港慣例, 享有免費泊車優惠。 否則, 停車場收費亦只係個半Euro一粒鐘, 比起香港同其他大城市真係濕濕碎。 想連泊車錢都慳埋, 你可以碰吓運氣隨街泊, 不過上班時間你真係要好彩, 撞岩有人走先會有位泊。

FIAT四隻字代表乜? 同SEAT一樣, 係四個字嘅縮寫, 分別代表Fabbrica Italiana Automobili Torino, 字面意思就係意大利都靈汽車製造廠。

美國有底特律, 英國有高雲地利, 泰國有羅勇, 強國有長春, 意大利亦有Torino。 都靈? 杜林? 拖連奴? Turin? Torino? 邊個先係正名? 個個都係, 只係唔同語文嘅唔同譯法。Torino係意大利文, 球迷除咗祖雲達斯之外, 一定聽過拖連奴啦! Turin係英文 , 都靈, 杜林都由此譯出。

Torino喺邊? Torino係意大利西北部嘅工業重鎮, 離中部嘅首都羅馬好遠, 不過去法國邊境只係一百公里。 由米蘭揸車過去, 只係大約兩粒鐘。 搭火車嘅話, 由米蘭中央火車總站亦有多班快車慢車開出, 轉唔轉車定係站站停, 任君選擇, 票價低至十幾Euro。

地址: Via Nizza, 262 – 10126 Torino

商場網址: http://8gallery.it

畫廊網址: http://www.pinacoteca-agnelli.it

Share

棍波死硬派, 菲林攝影死硬派, 自問前途死路一條... 死硬!

Comments are closed.

error: Protected Content