唔玩高深只求認真 Nissan Qashqai Plus

August 28, 2018
41,836 Views

性能唔是特別出眾,越野能力更加係零,咁的規格,到底點解會咁多人 buy?

根據《Focus2Move》巿場調查機構指出,喺目前全球汽車銷售巿場中,SUV 類別已佔了高達34.4%;而今年上半年的累積計算,Qashqai 已經打低很多歐美日韓對手,成為全球排名第六的最暢銷 SUV。

由歐洲設計及生產的第三代 Qashqai,抵港型號主要分為標準版 Qashqai 及今次長測的頂級版 Qashqai Plus,兩者分別主要是內裝配備,包括 Nappa 皮座、前電動座椅連發熱功能、駕駛席電動調校背部承托、側鏡同步下視功能、駕駛席及側鏡記憶,跟標準版車價相差$19,000。

如果你唔明今代的 X-OVER 設計概念係乜東東,唔緊要,最重要係你 buy 唔 buy 佢呢種歐陸風格。兩公升直四自然吸氣直噴機器,以 144ps 應付近 1.5噸體重唔算吃力,配搭7前速CVT波箱唔只暢順,拖波反應仲出奇地快,落斜想用 engine braking 來降低車速減少制動負荷,只要從D檔向右拍去手動轉波模式就會馬上降低一檔,想再慢啲,輕腳踩住迫力再向後拉一下波棍就掂。

我覺得最正係廿零萬貨仔,居然包埋4個泊車錄像鏡頭,組成的 IAVM 環視顯像系統除咗具備倒車後視之外,仲有高級房車才會有的鳥瞰式 360 度視像功能,雖然畫面細咗啲,但用起上嚟都好清楚睇到輪圈與路壆的距離;再配合埋針對車外近距離移動物的 MOD 動態探測系統,呢個無敵組合好少會喺45萬以下的汽車出現。

雖然本地巿場上唔少 SUV 都配備四驅系統及各式越野裝備,但真係會揸去攀山涉水的車主其實唔多,所以對於喜歡 SUV 個性化的造形及比一般房車較高離地距,又用不着高性能及攀爬功能的車主來講,呢類前輪驅動的 SUV 就非常適合了;至於配備鳥瞰式 360 度視像、MOD 動態探測、LDW 車道偏離警告、IEB 前方碰撞輔助制動、FCW 前方碰撞警告、Bi-LED 自動感光連 AFS 主動轉向頭燈的 Qashqai Plus,再加埋一個超巨型天幕的 Qashqai Plus,自然受實用型用家的歡迎。

由 Nappa 皮革包裹的座椅,甲骨形的設計幾特別,我估炎夏對背部及臀部有一定散熱作用。一對前座椅有發熱功能,開關按鈕喺手枕箱對落位置,不過我相信香港的天氣配冷氣椅會更加適合。至於後座的腳部空間,只要前座乘客唔把座位退得太後,基本上腳都ok的,唯一係為了製造足夠的頭頂空間,所以後座椅設定稍低,但相對來講就方便落車,有辣有唔辣。

操控方面,易揸,易睇位,轉向比例恰當,靈活,軚感適中;懸掛的濾震能力是一般家庭車的水準,車廂隔音不過不失,如觀塘啟福道往舊機隧方向末段這類粗糙路面,彈跳及路噪會較為明顯,其他巿區路面及高速公路表現中規中矩。軚盤後方右腳膝頭對上有個 ECO 慳油掣,撳着咗,油門敏感度會降低,不過位置剛好被軚盤遮擋,所以最好停低部車先好撳掣。長測4天,錄得平均耗油10.6L/ 100km。

Nissan Qashqai Plus規格表
引擎形式:L4 Twin VTC
汽缸容積:1,997c.c.
最大馬力:144ps@6,000rpm
峰值扭力:200Nm@4,400rpm
傳動形式:前置引擎‧前輪驅動
傳動系統:7前速XTronic CVT無段變速
懸掛系統:(前)麥花臣/ (後)多連桿
制動系統:(前)通風碟/ (後)實心碟
輪圈:19吋合金
輪胎:(前/後) 225/ 45 ZR19 Michelin Pilot Sport 4
長x闊x高:4,394 x 1,806 x 1,624mm
軸距:2,646mm
車重:1,490kg
耗油量:6.9L/100km
售價:HK$273,800

Share
Tags

Leave A Comment

error: Protected Content