好跑得 Porsche Cayenne S

October 10, 2018
39,927 Views

發展到第三代的 Cayenne,不單只形態上更像 Panamera,就連操控性能都非常接近。

我唔知如果 Ferdinand Porsche 見到這部 Cayenne 會有甚麼反應,但可以好肯定,Cayenne 的高性能理念唔只把 SUV 的生態徹底反轉,佢的出現對 Porsche 來講更加有如一顆靈丹妙藥。

血緣關係睇車尾
今代的車身線條變化唔大,當大家都利用頭燈及面罩去建立家族臉譜時,保時捷就選擇利用尾燈組合來製造血緣關係,所以嚟緊的 Macan,車尾設計都將會仿效 911 及 Panamera。標準頭燈有 Matrix LED 或者會跟住軚盤轉向的 PDLS (Porsche Dynamic Light System),至於今次測試的 Cayenne S 就配了再高一班的 PDLS Plus,燈組由84顆 LED 組成,除了具備轉向功能之外,仲識得因應環境自動調節光束及光暗,還有鋁合金行李頂架、Sport Chrono Package、21吋 Exclusive 胎軨連輪拱飾邊及14段電動調校兼備記憶功能前座椅,五項加埋連稅合共 $246,820。

擴大了行李艙
車廂唔再玩機艙式的密集功能鍵,換了跟 Panamera 相同的設計及12.3吋觸控屏幕,但中控台冷氣風口就保留傳統手動調校角度。軸距不變,車身總長多了 63mm,矮了 9mm,車廂空間跟上一代分別不大,但行李艙容量就多了100L;具備記憶功能的14段電動調校前座需要加錢,承托力與舒適性是一貫波子水準,值得一讚是今次後排有埋電動調校椅背斜度,乘坐質素升晒呢。

豐盈的低扭輸出
測試的 S 版採用 2.9公升V6雙渦輪增壓引擎,高壓燃油噴注被調至 250bar,汽門開啟時間經過重新調校,縮細了渦輪體積及採取反向旋轉,岐管與渦輪採用分離式設計及幫助引擎降温的全新擾流組件,加加埋埋,輸出就比舊款多了20hp。為了兼顧越野性能,波箱繼續採用傳動的 torque converter,改良後的 Tiptronic S,低速爬坡能力比舊款勁咗一倍,可輕鬆拉郁3.5噸以下的車輛,再加埋 Mud、Gravel、Sand 及 Rocks 的自選地形對應,問題只係你捨唔捨得揸去攀山涉水。

設定更加跑車化
頭段加速及轉波時間比以前快了,4波之後的流暢度亦拍得住 PDK 波箱;起步加速比上一代爽咗,原因應該跟車重輕了65kg 有關。配備 Sport Chrono Package 的 Cayenne S,「01」加速只需 4.9秒,這個速度已經拍住一輛純種跑車,但更厲害的是底盤調校,經過三代的進化已經更爐火純青,而且就算採用 Normal mode,都已經有非常貼服的彎路性能,如果想有更高強的跑山本領,可以加配全新的電子防傾桿及電動後輪轉向系統,攻彎就可以進一步減少車身傾幅,轉向更銳利敏捷;而另一項 Porsche Surface Coated Brake 選配項目,其 Tungsten-Carbide 的表層技術除了可以提升制動能力之外,更可減少迫力粉的積聚,可以話同時照顧到性能及美觀的需要。

2018 Porsche Cayenne S規格表
引擎:V6 Twin Turbo
容積:2,894c.c.
馬力:440hp@5,700-6,600rpm
扭力:550Nm@1,800-5,500rpm
傳動:前置引擎‧四輪驅動
波箱:8前速Tiptronic S全自動配軚盤+/-轉檔
0-100km/h:5.2秒
極速:265km/h
懸掛:(前)雙搖臂/ (後)多連桿
制動:(前/後)通風碟
輪圈:21吋合金
輪胎:(前)285/40 ZR21/ (後) 315/35 ZR21 Pirelli P-Zero
長x闊x高:4,918 x 1,983 x 1,696mm
軸距:2,895mm
車重:1,985kg
油耗:9.4-9.2L/ 100km (Combined)
廢排:213-209g/km
售價:$1,744,820

Share
Tags

Leave A Comment

error: Protected Content