男人的浪漫 Mercedes-Benz E 300 Cabriolet

December 22, 2018
39,458 Views

開篷車,對大部份女士來講都存在一大隱憂,所以才慢慢變成男人的浪漫。

女人,有兩位頭號天敵。
第一個,係會散發紫外線的太陽;第二個,係風,會吹到淑女變癲婆的陣風,所以開篷車對女人來講,就好似浪子咁,只可遠觀而不可褻玩。
男人呢?對個人儀容要求比較低,顧慮少啲,所以有公子哥兒 feel 的開篷車,很多男人都會like。

女人揸開篷車,印象中,見過唔超過10次,不過見親都是紮馬尾戴「銀超」的長髮美女;束起頭髮,關上側窗,兩個動作,其實已經唔會吹亂頭髮。揸開篷車固然有型,但亦有代價的,事關行李艙要預留收藏頂篷,所以容量偏細;要兼顧車體結構剛度,所以車身不能太長,間接影響車廂空間。

今次長測的 E 300 Cabrio,軸距跟 Coupé 版一樣是 2,873mm,以一部四座開篷車來講,後座空間算寬敞,頂篷收摺後,佔據的行李艙空間亦唔算多,最正是關篷之後,軟篷的線條可以維持 Coupé 的型格,而且隔音亦跟 Coupé 接近,只能從隧道內聽到有少許分別。

如果沒了數碼化儀表加中控台多功能12.3吋巨芒的話,想玩齊64種車廂燈飾,睇下劈彎時的 G-force 值,八卦下馬力及扭力輸出多少,又或者自訂軚盤輕重油門敏感度波箱轉檔時機的話,我諗成個駕駛艙都會放滿大大小小的調校掣及儀表;不過經過數碼化之後,儀表板就沒了以前的浮凸立體質感。

平治的車廂,無論用料及設計都唔會點失禮,我最 buy 是木紋飾件,觀感高級又有時代感;唯一挑剔是 Dynamic Select 選擇掣,除了未有因應右軚巿場而改變位置之外,以推拉方法上下選擇駕駛模式亦未夠方便。

兩公升直四 turbo,跟 Coupé 版輸出一模一樣,雖然重量令 Cabrio 在 0-100km/h 的加速表現比 Coupé 慢了 0.2秒,但影響只係起步階段。9G-Tronic 雖然構造是 torque converter,但暢順度及靈敏度都足以媲美雙離合器波箱,中段縮油番腳再踩都好夠力,而且唔好睇佢車身長就以為好難揸,因為轉向靈活的關係,所以女士都可以輕易駕馭;怕凍親香肩的話,仲可以額外購買 Airscarf 系統,三段暖風就會由椅背肩膊位置吹出。無論載住一家四口,又或者兩口子兜下風 relax 下都非常適合;長測4天,錄得每百公里平均耗油7.5L。

Mercedes-Benz E 300 Cabriolet 規格表
引擎:L4 Turbo
容積:1,991c.c.
馬力:245hp@5,500rpm
扭力:370Nm@1,300-4,000rpm
傳動:前置引擎‧後輪驅動
波箱:9G-Tronic全自動配軚盤+/-轉檔
0-100km/h:6.6秒
極速:250km/h
懸掛:(前)四連桿/ (後)多連桿
制動:(前/後)通風碟
輪圈:18吋合金
輪胎:(前)245/45 R18/ (後)275/40 R18 Pirelli Cinturato P7
長x闊x高:4,826x 1,860 x 1,428mm
軸距:2,873mm
車重:1,780kg
油耗:8.4-8.1L/ 100km (Combined)
廢排:167g/km
售價:$799,900

Share

Leave A Comment

error: Protected Content