拋妻棄子尋夢夜 Volvo XC90 T5 Momentum

January 30, 2019
38,915 Views

個子大,唔一定就等於粗粗魯魯不懂人情世故的,至少 XC90 大架豪邁得來,內裡是如此温柔體貼。

自從結咗婚,生埋兩條食人唔𦧲骨的恐龍仔之後,真係已經好耐好耐好耐無試過幾條麻甩摸住杯底講車講女人。

早排攞咗部 Volvo XC90 T5 長測5日,趁住兩條恐龍仔考完試在家無所事事,於是周末攞晒屋企啲單車遙控車飛機大炮,揸去冇雷公咁遠的大空地放電。7座設定的 XC90,行李艙基本容積已有314L,只要平放1張後座,就可以裝晒十幾件戶外玩物,計埋司機,仲可以坐到6個人。

我都知香港細,但估唔到真係細得咁交關,竟然係呢處山旮旯都畀我撞到兩個酒肉朋友,仲要係狹路相逢嗰隻,真係約埋都無咁啱。擇日不如撞日,我哋就決定約埋阿邊個同邊個,今晚一齊拋妻棄子,幾條麻甩出嚟癲番晚。

其實所謂「癲」,只係五個男人去食日式燒肉,開幾支 Sake 而已,跟未成家立室之前真係差得遠;不過我又幾掃興的,因為揸咗車,所以全晚以茶代酒。想起以前由曲仔、小福星,揸到 MR2、FTO 及 VR6,大山甲龍深淺赤石都留過唔少胎皮胎痕,個個都講到眉飛色舞,驚險回憶全部返晒嚟,畢竟當年只得廿零歲,覺得自己不會死,那種不負責任的輕狂,笑聲過後,其實都叫大家抹一把汗。

現在呢,上有高堂下有妻兒,揀車當然唔再好似以前咁,要講安全講實用講舒適,所以傾傾下,話題就轉咗去 SUV。雖然大家對各款 SUV 都可以高談闊論,但提到 Volvo 就同一時間望住我:「你今晚好似揸咗部 XC90 出嚟喎,部車得唔得?」

其實佢哋討論過的德國 SUV,大部分我都試過,我嘅意見係,呢款來自北歐的 SUV,跟其他對手最大的分別係底盤調校。我幾 like 呢部 XC90 的懸掛設定,柔軟度令人覺得車身好輕巧;操控感從容不迫,揸上手,有種好 relax 好 hea 的放假 feel。另外,由於大部份功能鍵都被收入了中控台的巨型輕觸式顯示屏內,只要用手向左撥一下,就可以進入多功能頁面,方便美觀又易用。另一個舒服位,是一對有延伸大腿承托功能的前座,墊位的弧度剛好跟小腿關節角度相近,揸長途車超正。

有個揸開 V6 偈的朋友插嘴問:「咁大部車行四汽缸,坐滿人都應該兩噸幾,會唔會腳軟㗎?」今次長測呢部 T5 Momentum,用的是兩公升直列四汽缸直噴渦輪增壓引擎,一腳「質」落油門,如果有人同你講,馬上感受到撕心裂肺的加速感,轉數仲嘭嘭聲係咁上的話,一定係滾你;不過輸出大大話話都有 254hp,加上千多轉已經可以爆出最大扭力,所以就算坐滿人,起圍超車都絕對唔會失禮。

不過又咁講,呢副直四配8前速 Geartronic 波箱,賣點係順滑如絲,就算巿區塞車在1、2、3波之間糾纏不清,都唔會覺得 chok;至於切換至運動化的 Dynamic mode 之後,雖然引擎效率明顯提高了,傳動亦變得緊湊,但加速仍然擺出漸進姿態,一副氣定神閒的樣子;比較可惜的是標準沒有配備軚盤轉波撥片,好彩波棍的觸感唔錯,呢 part 加番分。

講講下,原來時間都唔早,係時候交人,大家亦老實不客氣,全部衝晒上部 XC90。有個自己都揸緊部7人 SUV 的朋友,身高5呎9吋半,一個箭步捐咗入第三排,佢話腳位都係爭少少,但因為坐墊稍高,兼且中排可以向前滑移,所以坐得舒服過佢自己嗰部。有兩個揸 MPV 的朋友,話行車好靜,懸掛喺處理龍翔道一段路面舒服到佢哋以為舖咗瀝青,仲話勁 like 中座嗰張隱藏式兒童安全坐墊,我冇記錯的話,SUV 之中暫時只得 Volvo 有咁的設計。最後一個坐喺領航席,自己揸部高性能 SUV,行了幾個街口就瞓着了,冇機會感受下坐住五個大男人加埋大約800磅之後的加速力。第二日,大家在群組裡面問咗我一個問題:「尋晚部 XC90 使唔使75萬?」

Volvo XC90 T5 Momentum規格表
引擎:L4 Turbocharged
容積:1,969c.c.
馬力:254hp@5,500rpm
扭力:350Nm@1,500-4,800rpm
傳動:前置引擎‧四輪驅動
波箱:8前速Geartronic全自動配+/-轉檔
0-100km/h:8.2秒
極速:230km/h
懸掛:(前)雙搖臂/ (後)多連桿
制動:(前)通風碟/ (後)實心碟
輪圈:19吋合金
輪胎:(前/後)235/55 R19 Continental ContiSportContact 5
長x闊x高:4,950 x 2,140 x 1,776mm
軸距:2,984mm
車重:2,053kg
油耗:7.5L/100km
售價:$629,800

Share
Tags

Leave A Comment

error: Protected Content